Jamin mwenye umri wa miaka minane hakuwa mwerevu sana. Au angalau hivyo ndivyo kaka yake alivyomwambia. Karibu kila siku, kaka yake Kenny alipata njia za kumkumbusha Jamin mapungufu yake na kucheka makosa yake.
“Jamin, hutakuwa mwerevu kamwe,” Kenny alisema. Moyoni mwake, Jamin alihisi amekubali kwamba maisha yake yangekuwa ya kuchanganyikiwa na kufanya makosa. Je, angeendelea kuwa mtu asiye na ustadi daima? Je, angeendelea kusema mambo vibaya daima? Hivyo ndivyo Kenny alivyosema.
Jamin aliamini mahubiri ya Kenny kwa imani isiyo na shaka. Kenny alikuwa mkubwa kuliko yeye kwa miaka mitatu, kwa hiyo lazima alikuwa sahihi. Basi, sawa, Jamin angekuwa mtu asiye na akili nyingi. Kenny angekuwa mwerevu. Maisha hayakuwa ya haki. Baba na Mama hawakupenda maneno ya majivuno ya Kenny na walimwadhibu kila walipomkuta akitoa mojawapo ya hotuba zake. Lakini Kenny alikuwa na namna ya kusema bila wao kusikia. Kwa hiyo aliendelea kumdhihaki Jamin.
Bibi Otto alitazama majaribu haya akiwa kwenye kiti chake cha kubembea barazani. Alikuwa mwanamke mzee mtulivu.
“Jamin, unajua Kenny yuko wapi?” Mama aliuliza huku akitabasamu. “Karibu ni wakati wa chakula cha jioni.”
“Ameenda kukagua mitego yake ya koyoti. Nitaenda kumtafuta.”
Hewa ilikuwa na ubaridi alipokuwa akipanda kupitia kwenye nyasi za uani, na jua lilikuwa likielekea kutua alipovuka mpaka wa msitu. Vivuli vya muda mfupi vilikimbia juu ya vilima. Ubaridi ulizidi alipoingia ndani zaidi kwa hatua nzito. Alivuta hewa yenye harufu nzito na kufuata njia ya Kenny. Hatimaye, njia hiyo ingefika kwenye uwanda wa nyasi, lakini Jamin alitumaini angempata Kenny kabla hajalazimika kwenda mbali kiasi hicho. Mitego mbalimbali ilikuwa tayari imekaguliwa, kwa hiyo Jamin alijua Kenny alikuwa amepitia huko. Jamin aliendelea kutembea kwa hatua nzito, akiwa na azimio thabiti. Nywele zake za rangi ya dhahabu zilipokea miale hafifu iliyotoka kwenye jua na kupenya katikati ya miti. Na punde miale hiyo nayo ikafifia, ikiacha harufu nzito ya msitu. Viwavi wanaosuka utando wakati wa vuli walikuwa wamefanya kazi yao, na mapazia yao ya utando yalining’inia kama vifuniko kwenye matawi yaliyokuwa juu yake.
Hatimaye, miti ilipopungua na kutawanyika, na uwanda wa nyasi ukaonekana, Jamin alijua hapa ndipo njia ya mitego ya kaka yake ilipoishia. Ikiwa Kenny hakuwa hapa, asingejua mahali pengine pa kumtafuta.
Lakini Kenny alikuwa hapo. Jamin alipoingia kwenye uwanda kwa hatua nzito, aliweza kuona mtu aliyejikunyata kwa kufadhaika upande wake wa kulia. Sauti ya huyo aliyejikunyata ilikuwa ya kufahamika. Uso wake ulionyesha maumivu. Huyo aliyejikunyata alikuwa Kenny. “Uko salama? Kumetokea nini?” Jamin alihisi jambo lisilo la kawaida alipomwona Kenny amejikunyata chini kwenye udongo. Kenny alikuwa mwerevu. “Ulikanyaga mtego?”
“Ndiyo, Jamin. Mi..mimi sikuwa nikiangalia nilikokuwa nikienda. Nisaidie. Tafadhali.”
Jamin aliinama na kuona kifundo cha mguu kimeshikwa kwa nguvu na taya za mtego wa chuma cha pua. Giza lilitanda juu ya ardhi iliyomzunguka Kenny. Kwa haraka, Jamin alitumia mikono yake yenye nguvu kufungua taya hizo. Kenny aliyumba alipojinasua. “Unaweza kutembea?”
“Ndiyo. Nafikiri naweza. Ukinishikilia, naweza kwenda nikichechemea.”
“Baba na Mama watakuwa na wasiwasi. Tumekosa chakula cha jioni.”
Kwa kweli, ndugu hao walipokuwa wakirudi kupitia msituni kwa kuchechemea, walimsikia baba yao akiita kwa sauti ndefu. Jamin aliitikia, na baada ya muda mfupi baba alikuwa pembeni yao; alikiona kifundo cha mguu na kumwinua Kenny kama kondoo aliyejeruhiwa. Kikundi hicho kidogo kisicho cha kawaida kiliharakisha kurudi nyumbani, na mlango wa wavu ukafungwa kwa kishindo Baba alipovuka baraza kwa haraka. Jamin alienda kwenye kibanda cha kuogea na kusugua mikono yake mpaka ikawa safi. Akaelekea kwenye mlango wa mbele.
“Jamin.” Alikuwa Bibi. Mwanga wa barazani ulimwonyesha akiwa kwenye kiti chake cha zamani cha kubembea. Blanketi zito lilikuwa limetanda mabegani mwake.
“Naam, Bibi?”
“Unafikiri wewe si mwerevu sana?”
“Hivyo ndivyo Kenny anavyosema.” Jamin alijitikisa kwa kutokuwa na raha.
“Ulikuwa na nguvu za kutosha kufungua mtego, lakini Kenny hakuwa nazo. Ulikuwa na ujasiri wa kutosha kumtafuta gizani. Wavulana wengi wadogo wasingekuwa nao.” Jamin alinyamaza. Bibi Otto aliendelea kubembea kidogo, kisha akatabasamu. “Mungu alikuumba jinsi ulivyo kwa sababu fulani, Jamin. Alimuumba Kenny jinsi alivyo kwa sababu fulani. Ana mpango kwa ajili yako, na nafasi ambayo wewe peke yako unaweza kuijaza, unajua.”
Jamin aligeuka na kuingia jikoni kulikokuwa na joto. Alikuwa akitabasamu.
