Iemand het eendag gesê: “Wanneer hoop leef, is die nag minder donker, die eensaamheid minder diep en vrees minder skerp.” Toe ek as assistent-predikant in ’n tronk gewerk het, het ek by die ter dood veroordeelde mans gesit en geluister terwyl hulle van hul benoudheid praat. Byna sonder uitsondering het almal gehoop om eendag uit die tronk te kom. Selfs al het hulle ’n lewenslange vonnis gehad, het hulle gehoop om uit te kom.
Ek het met mense gepraat wat nie bely dat hulle wedergebore is nie, maar toch hoop om hemeltoe te gaan. Hierdie mense durf nie ophou hoop nie. Hul hoop berus op hul eie hoop! ’n Dieet van daardie soort hoop is beslis ’n magertjie! Hierdie redenasie herinner my aan Jesus se woorde in Johannes 10:1–2 oor die ingaan in die skaapkraal. “Maar wie deur die deur inkom, dit is die herder van die skape.” Mense bou hul hoop op die hemel op baie wankelrige dinge. Sommige bou hul hoop op die feit dat hulle in ’n sekere kerk gedoop is. Ander hoop op hul kerklidmaatskap. Sommige mense hoop op hul goeie werke, terwyl ander hoop op hul eie hoop. Die Bybel sê egter: “...as iemand nie van nuuts af gebore word nie, kan hy die koninkryk van God nie sien nie” (Johannes 3:3).
Daar is ’n ware hoop en ’n valse hoop. Die valse hoop is om “op ’n ander manier op te klim,” maar ware hoop is “wie deur die deur inkom.”
“Want ons is gered deur die hoop; maar hoop wat gesien word, is nie hoop nie: want wat iemand sien, waarom hoop hy nog?” (Romeine 8:24). Hierdie woord hoop beteken “met afwagting of groot verwagting.” Kan ons sê dat ons deur groot verwagting gered word? Ja, ons kan. “Werk nie vir die voedsel wat vergaan nie, maar vir dié voedsel wat bly tot die ewige lewe, wat die Seun van die mens julle sal gee; want daartoe het God die Vader Hom versegeld” (Johannes 6:27). Dit lyk asof dit ’n soort teenspraak is. Is ons nie deur genade gered nie? Ja, ons word deur genade deur die geloof gered (Efesiërs 2:8). Wat beteken dit dan om deur hoop gered te word en te swoeg vir die “kos wat bly tot die ewige lewe”?
“Toe sê hulle tot Hom: Wat moet ons dan doen, opdat ons die werke van God mag werksaam? Jesus antwoord en sê tot hulle: Dit is die werk van God, dat julle in Hom glo wat Hy gestuur het” (Johannes 6:28–29). Dit is slegs deur genade dat ons gered word, maar soos hierdie gedeelte aandui, stel genade ’n voorwaarde. Die voorwaarde van genade is dat ons in Hom glo. ’n Ander voorwaarde van die saligheid is bekering (Markus 1:15), terwyl ’n ander is die dra van die kruis. “Wie agter My wil kom, moet homself verloën en sy kruis opneem en My volg” (Markus 8:34).
Alles wat ons vir Christus sou doen — of dit nou glo, bekeer of die kruis dra is — geskied deur genade. Wat ook al ons het of doen, is weens Hom. Ons werk nie vir ons saligheid nie, want Christus self het gesê: “Dit is volbring.” Ons het niks om op te hoop as ons nie aan die voorwaardes van ons saligheid voldoen nie. Sodra ons die Here Jesus as Verlosser ontvang, dan “stel die hoop nie beskaming nie” (Romeine 5:5).
Namate Christus in ons lewendig word, liefhet ons Hom en kies om Hom te gehoorsaam. Jesus word vir ons kosbaarder soos ons in ons christelike lewe volwasse raak. Soos ons verhouding groei, groei ook ons verwagting. Hoe meer ons Hom leer ken, hoe meer sien ons daarna uit om in Sy teenwoordigheid te wees. Namate ons afwagting om Hom te sien groei, probeer ons alles moontlik doen om Hom te behaag. Ons groot ywer weerhou ons daarvan om moeg te word; daarom “is ons gered deur hoop.”
Is jou hoop soos dié van iemand wat “op ’n ander manier opklim,” of soos “wie deur die deur inkom”? Het jy ’n grondslag vir jou hoop of is dit ’n leë hoop sonder fondament?
Ek vertrou dat jy groei “...in alles na Hom toe, wat die Hoof is, Christus” (Efesiërs 4:15).
Ek hoop jy sal net ’n bietjie meer groei, sodat jou verwagting om Christus te sien ook mag groei. Die getuienis van hierdie verwagting is: “...hiervoor sug ons ook, en ons verlange is ernstig om met ons woning wat uit die hemel is beklee te word” (2 Korintiërs 5:2).
