Unakuwa kijana mara moja tu, kwa hiyo jitahidi kupata mengi uwezavyo katika kipindi hicho! Katika mchezo wa besiboli, unapewa nafasi tatu za kukosea kabla hujatolewa nje. Kwa hiyo, ukiwa zamu yako kupiga na ukakosa mara ya kwanza, si jambo kubwa—bado una nafasi mbili za kukosea. Hata hivyo, ukijitenga na ratiba yako ya kila siku na kutazama maisha yako kwa ujumla kwa mtazamo wenye uhalisia, utatambua kwamba unakuwa kijana mara moja tu. Unapata nafasi moja tu ya kupitia kipindi hicho. Ukishafikisha miaka ya ishirini, huwezi kusema, “Subiri kidogo, nipe nafasi ya pili.” Kikiisha, kimeisha milele. Ukweli huu wenye kutuamsha unatupasa kujiandaa kiakili na kujitahidi kuutumia kikamilifu wakati wetu wa thamani wa ujana.
Ikiwa wewe ni kijana wa kawaida tu, basi makala hii ni kwa ajili yako. Sina nia ya kuweka kiwango kisicho halisi ambacho kinaweza kufikiwa tu na watu wachache “wa kiroho kupita kiasi” ambao hawazuiliwi na kazi au majukumu. Najua jinsi ilivyo kukabiliana na mambo ya kawaida ya masomo, kazi za nyumbani, na ajira. Na ni kwa vijana hao—vijana wa kawaida—ndipo ninapotoa mapendekezo machache ya vitendo kutokana na uzoefu wangu mwenyewe kuhusu jinsi ya kutumia vizuri ujana wenu.
Jambo la kwanza kabisa akilini mwangu ni sala ya faraghani. Bila shaka, umesikia mahubiri mengi kuhusu mada hii hii. Sina shaka kwamba wengi wenu mnaweza kueleza kwa kina umuhimu na faida za maisha ya sala yenye nguvu na ya siri. Hata hivyo, licha ya yote niliyofundishwa kuhusu jambo hili, wakati mwingine nimekata tamaa niliposikiliza au kusoma masimulizi yenye kusisimua kuhusu watu wakuu wa sala. Naam, lilikuwa kisa kizuri sana … alikuwa mpiganaji wa sala wa namna gani! Lakini hilo linahusianaje na maisha yangu? Ninajihisi kama ng’ombe katika malisho makavu, nikitazama kwa hamu juu ya ua nyasi za kijani kibichi upande wa pili. Hata hivyo, kila ninapojaribu kuelekea huko, nagundua kwa uchungu kwamba kuna waya wenye miiba unaonizuia.
Sijui kama umewahi kujihisi hivyo, lakini mimi hakika nimewahi. Tuseme unasoma wasifu wa mtu wa Mungu na kufikiri, “Nataka kuwa kama yeye!” Ghafla mawazo yako yanakatizwa na kugundua kuwa ulipaswa kuanza masomo yako dakika saba zilizopita. Kwa hiyo unavuta pumzi na kusema, “Naam, nadhani hakuna njia ya kufikia kiwango kama hicho.”
Baada ya kusema hayo yote, ningependa kueleza njia niliyoipata ya kukabiliana na mvutano huu. Kila kijana huwa na wakati wa “ziada”—kwa kiasi kikubwa au kidogo. Nilipokuwa kijana nilianza kutambua kwamba (ingawa siwezi kuwa John Hyde sasa hivi) ninaweza kuanza kutumia wakati wangu wa “ziada” kuwa peke yangu na Mungu. Maisha ya shambani humfanya mtu awe na shughuli nyingi daima, lakini niligundua kwamba Jumapili alasiri ulikuwa wakati wangu wa kupumzika. Badala ya kupoteza saa hizo kwa anasa zisizo na maana, nilikuwa nikijiondoa na kwenda msituni. Huko, bila vizuizi wala vikengeushi, nilimimina moyo wangu mbele za Mungu. Huko, peke yangu mbele zake, Mungu alifanya mambo mengi ya kina ndani yangu … mambo yaliyoathiri mwenendo wa maisha yangu. Siwezi kusisitiza kupita kiasi umuhimu wa jambo hili kwako. Ikiwa unataka kutumia kikamilifu miaka yako ya ujana, basi lazima upate wakati na mahali pa kuwa peke yako na Bwana wako.
Niwe wa kwanza kukuonya: ukichagua njia hii, haitakuwa rahisi! Ukiamua kutumia baadhi ya wakati wako wa “ziada” kumtafuta Mungu, tarajia sababu nzuri tisini na tisa za kwa nini sasa si wakati wa kuanza. Hata baada ya kushinda kundi hilo la visingizio, bado unaweza kujihisi vibaya. Mtu husali kuhusu nini kwa saa mbili hata hivyo? Mara nyingi tunakosa la kusema baada ya dakika kumi. Kwa kweli, hilo ni jambo zuri. Sala si kurudia tu orodha ya mahitaji; ni mawasiliano ya pande mbili na Mungu wa mbinguni.
Jifunze kutulia mbele za Mungu. Mara nyingi nilipokaa mbele zake, nimejisikia vibaya kwa sababu ya ubinadamu wangu wa dhambi na udhaifu wangu. Watu wengi hukata tamaa hapo hapo. Niamini, nimepitia hali hiyo … mara nyingi sana. Lakini kijana wangu mpendwa, ni hapo unapopaswa kudumu. Kubali hali hiyo ya kutokuwa na raha. Mruhusu Mungu akuchochee na kukuonyesha mahitaji yako. Hutaweza kamwe kutumia kikamilifu ujana wako kwa kuzika kichwa chako mchangani, yaani, kujizamisha katika pilikapilika za “maisha ya Kikristo,” ili usikabiliane kamwe na mahitaji yako. Ukidumu na kupita katika kujichunguza huku kwa kina moyoni mwako, pia utafikia mahali ambapo Mungu ataanza kukupa mawazo na matarajio ya wakati ujao.
Mara nyingi tunadhani kimakosa kwamba mwelekeo wa maisha yetu huamuliwa na maamuzi machache makubwa yanayofanywa wakati wa majanga. Kwa kweli, maisha yetu tukiwa vijana hujengwa na maamuzi mengi madogo tunayofanya kila siku. Mara nyingi maamuzi haya hufanywa bila hata kutambua. Hata hivyo, hufanywa kulingana na maadili yetu. Unapokuwa peke yako na Mungu mara kwa mara, atabadilisha maadili yako. Maadili yako yanapobadilika, utaanza kufanya maamuzi ya kumcha Mungu yatakayounda maisha yako. Kwa kifupi, utakuwa ukifanya chaguo zitakazokusaidia kutumia kikamilifu miaka yako ya ujana.
Kwa sasa ninaishi miongoni mwa watu ambao kutojua kusoma na kuandika ni jambo la kawaida. Kwa sababu hiyo, ninatambua daima tofauti kubwa iliyopo kati ya wale waliosoma kitaaluma na wale ambao hawakusoma. Hata hivyo, ukimuuliza mwanafunzi yeyote anapowasili nyumbani kutoka shuleni, “Umejifunza nini leo?” kuna uwezekano mkubwa mtoto huyo asiwe na uhakika kwamba amejifunza chochote siku hiyo. Je, hiyo inamaanisha kwamba siku hiyo ilipotea bure?
Sote tunajua kutokana na uzoefu wetu kwamba baada ya kwenda shule kila siku kwa miaka minane hadi kumi na miwili (licha ya kwamba huenda maendeleo ya kila siku yasionekane), matokeo yake yatakuwa kwamba unaweza kusoma, kuandika, kufanya hesabu za msingi, na tunatumaini mambo mengine mengi zaidi. Mhitimu anatofautiana waziwazi na mwanafunzi aliyeacha shule ambaye aliacha akiwa darasa la kwanza kwa sababu hakuweza kuona mabadiliko yanayopimika kila siku. Mwishowe, baada ya miaka ya kuendelea kwa uthabiti, mmoja huwa tayari kuwa sehemu yenye tija ya jamii, ilhali mwingine hawezi hata kuandika jina lake mwenyewe, sembuse kusoma maelekezo. Ni wazi kwamba tofauti hii haikutokea tu yenyewe. La, ni matokeo ya moja kwa moja ya jinsi walivyokuwa waaminifu katika masomo yao.
Vivyo hivyo ndivyo ilivyo kuhusu kutumia wakati pamoja na Mungu. Vijana wengi hawafanyi jambo hili kuwa desturi ya kawaida kwa sababu hawaoni tofauti kubwa mara moja. Je, hatupaswi kujifunza jambo kutoka kwa wanafunzi shuleni? Lazima tujifunze kudumu kama wao! Ukichagua kutumia wakati wako wa “ziada” kumtafuta Mungu, huenda usione mabadiliko yoyote ya haraka ndani yako. Usikate tamaa wakati huo muhimu, bali endelea kumtafuta Bwana wako kwa mazoea, nami nakuhakikishia kwamba Mungu atakubadilisha!
Yoshua hakuchaguliwa tu na Mungu kuwaongoza Israeli kwa bahati. La, hilo lilitokea kwa sababu akiwa kijana alibaki katika hema ya kukutania. Hapo, mbele za Yehova, ndipo mmoja wa viongozi wakuu wa Israeli alifanyika. Mungu atafanya vivyo hivyo kwako. Ukimtafuta kwa siri, utazidi kufanana na Kristo, malengo yako yatabadilishwa na yake, naye atakuzuia usiupoteze ujana wako. Ukidumu kwa uthabiti kama wa mwanafunzi ili kupata muda wa kuwa peke yako na Mungu wakati wako wa “ziada,” maisha yako yatakuwa tofauti kabisa na kama ungefanya vinginevyo. Njia moja ya maisha itakuleta mahali ambapo “umekubaliwa na Mungu, mtenda kazi asiye na sababu ya kuona aibu …” Nyingine, wakati utakapofika ambapo “imewapasa kuwa walimu,” utagundua kwamba “mnahitaji mtu awafundishe tena …”
Shetani anajua kwamba hawezi kumzuia kijana mwenye maisha ya sala yenye kina na nguvu. Unaweza kuwa na hakika kwamba anajitahidi sana kukuzuia usijihusishe na zoezi hili takatifu. Mojawapo ya mbinu zake anazopenda ni kukuweka bize sana ukikimbizana na mambo mengi kiasi kwamba huwezi kamwe kupata wakati wa kuwa peke yako na kutulia mbele za Mungu. Hili linanikumbusha Farao wa Misri. Musa alitokea akiwa na nia ya kuwaongoza watu wa Mungu watoke wakaabudu Bwana. Alipotambua kwamba angeingia matatani ikiwa jambo hilo lingetokea, Farao alijitahidi kulizima wazo hilo tangu mwanzo. Alitumia mbinu gani? Kutoka 5:6 inasema kwamba “siku iyo hiyo” Farao alitoa amri kwa wasimamizi wa kazi za watumwa waache kuwapa Waisraeli majani makavu yaliyotumiwa kutengeneza matofali. Hata hivyo, alisisitiza kwamba kiwango cha uzalishaji kisipunguzwe hata kwa tofali moja. “Msiwape watu majani tena ya kutengenezea matofali, kama mlivyofanya hapo awali; waache waende wakajitafutie wenyewe majani. Wala msipunguze hata kidogo idadi ya matofali waliyokuwa wakitengeneza hapo awali; kwa maana wao ni wavivu; ndiyo maana wanalia, wakisema, Twende tukamtolee Mungu wetu dhabihu. Kazi iwekwe nzito zaidi juu ya watu hawa, ili washughulike nayo, wala wasijishughulishe na maneno ya uongo.”
Farao alipanga kuwafanya wasahau hamu yao ya kwenda kumwabudu Mungu kwa kuwatwisha shughuli nyingi bila kukoma. Kisa hiki kinaonyesha sawasawa mpango wa shetani kwa ajili yetu vijana. Anajua kwamba akifanikiwa kutuvuruga kwa mambo mengi yasiyoisha ya kufanya (hata mambo yasiyo mabaya), kiasi kwamba hatupati kamwe nafasi ya kujinasua na kwenda “jangwani” kumwabudu Mungu, basi hana chochote cha kutuogopa.
Laiti tungekuwa kama Musa! Mbinu za Farao hazikufanikiwa kwake. Musa alikataa kuruhusu utengenezaji wa matofali umzuie yeye na watu wake kuitikia wito wa Mungu wa kwenda jangwani. Laiti sisi vijana tungefanya vivyo hivyo! Tukatae kusombwa na shughuli nyingi zinazotuzuia kuwa peke yetu na Mungu. Kijana mpendwa, ikiwa unataka kutumia kikamilifu ujana wako, jifunze kuukomboa wakati wako kwa kuwa peke yako na Mungu.
Na kumbuka … unakuwa kijana mara moja tu, kwa hiyo jitahidi kupata mengi uwezavyo katika kipindi hicho! ~
