Sisi ni “Wakristo wa Ulimwengu.” (Lakini si Wakristo wa kidunia.) Tunatanguliza upendo wa Mungu kwa watu wote. Hakuna jamii ya rangi iliyo bora kuliko nyingine, hakuna serikali inayopendwa zaidi kuliko nyingine, hakuna nchi inayopendwa zaidi kuliko nyingine. Hatuweki uchumi wa taifa letu mbele ya uchumi wa Mungu. Anatuambia tutafute kwanza ufalme Wake. Kisha atatimiza mahitaji yetu.
Tunachochewa kutenda kila siku kwa kujua kwamba mabilioni ya watu hawamjui Mwokozi wetu. Shauku yetu maishani, tamaa yetu isiyozimika, ni kuwafikishia upendo wa Mungu.
Hakuna kazi iliyo ndogo mno kwetu. Kinachotuzuia tu ni utayari wetu wa kuamini kwamba Mungu anaweza kutuwezesha kuifanya.
Tumejitoa kikamilifu kwa Yesu Kristo, Mwokozi na Bwana wetu. Hakuna pungufu ya hayo. Tunaelewa kwamba kumfuata kunamaanisha kufa kabisa kwa nafsi zetu. Inagharimu kila kitu kuwa mfuasi Wake.
Usitupatie baraka—utupatie neema ya kutii bila kusita kila amri na kila tamanio Lako, hadi la mwisho.
Usitupatie hadhi—utupatie nafasi ya kutumika.
Usitupatie vitu vya kutumia—tutumie sisi.
Usitupatie jumba la kifahari la kuishi—utupatie jukwaa la kurukia ili kupeleka upendo wa Kristo kwa ulimwengu wote.
Usitupatie kazi nzuri—tupe kazi ya kufanya.
Usitupatie starehe—tuamuru.
Usitupatie raha—utupatie mtazamo.
Usitupatie kuridhika—tufundishe kujidhabihu.
Usitupatie burudani—tuwezeshe.
Usitupatie mishahara mizuri—utupatie nguvu za kufanya mapenzi Yako.
Furaha yetu kuu maishani ni kumpendeza Bwana wetu—na hakuna furaha nyingine inayoweza kulinganishwa nayo.
Tumechoshwa na kujifanya kuwa na dini, tumechoshwa na seminari na shule za Biblia zinazozalisha wanafikra wasiotenda, tumechoshwa na maisha ya kanisani yanayojumuisha shughuli chache za kawaida na mahubiri yanayosikika vizuri kana kwamba yanapimwa kama hotuba, lakini hayana thamani yoyote ya maana isipokuwa kuridhika na hali ilivyo. Maisha si kipindi cha takriban miaka 70 tunachovumilia hadi Kristo atakaporudi au kutuchukua nyumbani, wala si wakati wa kutafuta utimilifu binafsi.
Hatutafuti kujitimiza—tunajitahidi kuufanya upendo wa Mungu uwe halisi katika mioyo yote.
Hatutafuti haki zetu binafsi—tunatafuta kuona watu wote wakiwekwa huru.
Hatufanyi mipango—tunapokea maagizo.
Hatuna malalamiko—isipokuwa mioyo yetu isiyo na shukrani.
Hatuna visingizio—vinamwekea Mungu mipaka.
Hatuulizi sababu—tunaomba majukumu.
Hatumpei Mungu 10% ya mapato yetu—tunampa yote.
Hatufanyi kazi kwa ajili Yake kuanzia 8 hadi 5—sisi ni Wake kwa saa 24 za kila siku.
Sisi si watu wasioonyesha hisia—tunaumia na kulia wapendwa wanapotutoka. Lakini tunaumia zaidi kwa ajili ya watu wanaoingia katika umilele bila kumfanya Yesu Kristo kuwa Bwana wao. Sisi si “waliojiondoa” kwa sababu hatuna kazi “zenye heshima na usalama”—sisi “tumejitoa kikamilifu.”
Sisi si watu wenye dhihaka na wasioamini nia njema za wengine. Ingawa kuna maswali yasiyo na majibu, tunajua Kristo ana majibu yote.
Sisi si wenye uchungu. Ingawa tumeumizwa, Kristo ndiye mponyaji wetu.
Hatutumii saa zisizo na mwisho kugombania masuala ya pembeni, kama vile mitazamo mahususi kuhusu eskatolojia.
Hatujivunii kupata vitu.
Tunasema kwamba haina maana kuzungumzia kupatikana au utayari. Afadhali tutii na kufanya kazi hiyo, badala ya kuizungumzia.
-Mwandishi hajulikani (Imetoholewa)
