Baada ya kuishi Haiti kwa miezi kadhaa, hatimaye nilipata fursa ya kwenda kumtembelea mganga wa kienyeji. Nilipokuwa nikitembea kupanda barabara yake ndefu ya kuingia, nilipita sanamu nyingi na alama za kishetani. Kwa kweli, palikuwa na hali ya kutisha. Nilipokaribia hekalu la voodoo lililounganishwa na nyumba yake, nilimwona amesimama pale akinitazama nikija. Moyo wangu ulianza kwenda mbio; nilijua alikuwa mtu mwenye nguvu. Kisha akaanza kucheka. Kadiri nilivyomkaribia, ndivyo alivyocheka kwa sauti zaidi. Nilishangaa kidogo hadi nilipotambua kwamba watu wengi kutoka kijijini walikuwa wakinifuata kwenye njia hiyo. Walipendezwa sana kujua ni nini kingetokea. Nilimkaribia mtu huyo, bila kujua ni nini kingefuata.
“Je, wewe ni mchungaji?” akauliza.
“Ndiyo, mimi ni mchungaji,” nikamjibu. Tena, akaanza kucheka kwa sauti kubwa.
“Ninyi wachungaji mko sawa tu,” akatangaza. “Mnataka kila mtu aje kwenye makanisa yenu, lakini makanisa yenu hayana nguvu! Mtu wenu anapougua, anakuja kwangu. Hamna nguvu, ninyi Wakristo!”
Mzigo mzito ulinilemea, nami nikamweleza kwamba nilikubaliana naye, lakini kanisa la kweli la Yesu Kristo lingekuwa na nguvu daima. Kwa kweli, Biblia inasema kwamba milango ya kuzimu haitalishinda.
Huu ulikuwa mwanzo wa uhusiano wenye kuvutia sana, lakini sitasahau kamwe maneno hayo—hakika yalitoka kwa shetani mwenyewe—“Ninyi Wakristo hamna nguvu!”
Tangu wakati huo nimetembelea mamia ya makanisa, nami sina budi kukubaliana na yule kuhani wa voodoo. Makanisa ya Kikristo hayana nguvu. Lakini kwa nini? Tunajua kwamba Mungu ni nguvu. Tumeelewa mambo mengi, tunapendeza kwa sura na kwa sauti, lakini je, bado tuna nguvu za Mungu katika makanisa yetu?
Katika Agano la Kale tuna mifano mingi ya nguvu na ya kukosa nguvu. Tunaweza pia kujifunza jinsi tunavyopokea nguvu, na kwa nini tunazipoteza.
Katika Yoshua, sura ya 6, tunapata simulizi tunalolifahamu kuhusu wana wa Israeli na mji wa Yeriko. Mungu anamwambia Yoshua na watu wote wa vita kuuzunguka mji, wakiuzunguka mara moja kila siku kwa siku sita. Kisha siku ya saba walipaswa kuuzunguka mji si mara moja tu, bali mara saba. Baada ya kukamilisha mizunguko hiyo saba kuuzunguka mji, makuhani walipaswa kupiga tarumbeta zao.
Tunajua kilichotokea Yoshua alipotekeleza kila amri—kuta zile nene zisizopenyeka zilianguka chini. Mungu pia alimpa Yoshua amri kali kuhusu yale ambayo watu walipaswa kufanya na yale ambayo hawakupaswa kufanya. Walipaswa kujiepusha na kila kitu ambacho Mungu alikuwa ametangaza kuwa kimelaaniwa; fedha zote, dhahabu, na vyombo vilipaswa kuwekwa wakfu kwa ajili ya hazina ya Bwana; hakuna mtu aliyepaswa kuchukua chochote katika nyara.
Hata hivyo, Akani aliona vitu vizuri alivyovitamani. Akavificha ndani ya mavazi yake ya kivita, kisha baadaye akavificha chini ya hema lake, na hakuna aliyeona chochote.
Baada ya ushindi huo mkuu, Yoshua alituma wapelelezi kwenye mji uliofuata, Ai, ili kujua jinsi mji huo ulivyokuwa umeimarishwa. Watu hao walirudi na kumwambia Yoshua asiwatume watu wote kwenda Ai, kwa kuwa kulikuwa na walinzi wachache tu waliokuwa wakiulinda mji.
Hata hivyo, watu wa Ai waliwashinda wana wa Israeli na kuwafukuza. Zaidi ya hayo, Yoshua akararua mavazi yake na kumlilia Mungu. Kisha Mungu akajibu kwamba kulikuwa na dhambi kambini mwa Israeli.
Katika Agano la Kale, kwa kawaida wana wa Israeli huwakilisha kanisa la Yesu Kristo la leo. Je, hatuwezi kujifunza mengi kutokana na simulizi hili? Wakati hakukuwa na dhambi kambini (au kanisani), watu wa Mungu walishinda kabisa; hakuna hata mmoja wao aliyepotea. Walifanya mambo mengi ya ajabu, wakawaangamiza maadui wao wote waliowazunguka, nao wakaishi katika ushindi KAMILI. Hata hivyo, mara tu dhambi ilipoingia katikati yao, hata dhambi ndogo iliyofanywa na mtu mmoja tu, walipoteza nguvu zao. Hawakuwa tena na ushindi dhidi ya maadui wao.
Kinachofuata ni maelezo ya wazi ya jinsi wana wa Israeli walivyoshughulikia dhambi iliyoingia kambini. Iliangamizwa kabisa.
Yoshua, na Israeli wote pamoja naye, wakamtwaa Akani mwana wa Zera, na ile fedha, na joho, na lile bamba la dhahabu, na wanawe, na binti zake, na ng'ombe wake, na punda wake, na kondoo wake, na hema lake, na vitu vyote alivyokuwa navyo; wakavileta kwenye bonde la Akori … Israeli wote wakampiga kwa mawe, nao wakawateketeza kwa moto… –Yoshua 7:24-26.
Katika simulizi hili ni wazi kwa nini watu wa Mungu walipoteza nguvu zao—kulikuwa na dhambi kambini. Pia ni wazi kile kilichohitajika ili wapate tena nguvu walizokuwa wamepoteza—kuondoa dhambi.
Katika sura ya 8 tunasoma kwamba nguvu zilirudishwa kwa Israeli mara moja baada ya dhambi kushughulikiwa. Tena, waliishi katika ushindi!
Sehemu nyingine katika Agano la Kale inayozungumzia jambo hili imo katika Mambo ya Walawi sura za 13 na 14. Ukoma ulikuwa ugonjwa wa ajabu. Mtu akipata ukoma, ungeenea kwa urahisi. Kwa hiyo, ilihitajika kuwe na miongozo kali kuhusu jinsi ya kukabiliana na ugonjwa huo. Kuhani alipaswa kumchunguza kwa makini sana mtu husika ili kuona kama kweli alikuwa na ukoma au la. Ikiwa kuhani hakuwa na uhakika, angemfungia mtu huyo ndani ya chumba kwa siku saba kisha amchunguze tena. Ikiamuliwa kwamba mtu huyo alikuwa na ukoma, basi alitumwa nje ya mji.
Paulo anapolihutubia kanisa la Korintho, anawaambia kwamba amesikia kuna dhambi kanisani. Anaonekana kushangazwa kwamba kanisa hilo linachukulia jambo hilo kirahisi hivyo, …Je, hamjui kwamba chachu kidogo huchachusha donge lote? Basi ondoeni chachu ya zamani, ili mpate kuwa donge jipya, kama mlivyo bila chachu… –1 Wakorintho 5:6-7. Baadaye analiambia kanisa, …Basi mwondoeni mtu huyo mwovu miongoni mwenu –1 Wakorintho 5:13.
Tuseme umesikia habari kwamba ukoma umekuwa tena tatizo kijijini kwenu. Ugonjwa huu unaoharibu mwili umerudi tena, na watu wengi wa kijiji chenu wameambukizwa. Kisha unaketi kanisani Jumapili asubuhi, milango inapofunguliwa na mwanamume anaingia akiwa na ngozi na nyama zikining'inia kutoka kwenye viungo vyake. Ameambukizwa vibaya sana, lakini haonekani kujua hilo. Ungefanya nini? Vipi kama angetaka kuja kuketi karibu nawe? Vipi kama angetaka kuzungumza na watoto wako? Nafikiri sote tunajua tungefanya nini; tusingemruhusu aingie katikati yetu. Tunawapenda watu wetu na familia zetu mno kuweza kufanya hivyo.
Vipi kuhusu dhambi? Je, tunaiacha dhambi ije na kujiunga nasi? Je, tunaitilia maanani? Ni jambo gani baya zaidi, kuambukizwa ugonjwa unaoharibu mwili au kuambukizwa dhambi inayoharibu roho? Kumbuka, mshahara wa dhambi ni mauti—mauti ya kiroho; mauti ya milele. Ikiwa tungeishughulikia dhambi jinsi tunavyoweza kushughulikia ugonjwa huo (na tunapaswa kufanya hivyo), basi makanisa yetu yangekuwa tena na nguvu za Roho Mtakatifu.
Biblia inasema …mtapokea nguvu, akiisha kuwajilia juu yenu Roho Mtakatifu: nanyi mtakuwa mashahidi wangu katika Yerusalemu, na katika Uyahudi wote, na Samaria, na hata mwisho wa dunia –Matendo 1:8.
Tayari tumeona jinsi dhambi inavyotutenga na nguvu za Mungu, na pia tumeona jinsi Mungu anavyotaka kutupa nguvu. Anataka tushinde adui—shetani, ulimwengu, na mwili. Hata hivyo, kuna jambo linaloonekana kutokea katika makanisa yetu—tunaiacha dhambi iingie. Ni jambo la kawaida kumsikia mhubiri akisema, “Hakuna aliye mkamilifu.” Au, “Sisi sote hutenda dhambi.” Laiti tungetambua madhara yanayoweza kusababishwa na kauli hizi. Yesu alikuja kutuokoa kutoka katika dhambi ZOTE; udhalimu WOTE. Ikiwa tutaachwa tuendelee katika dhambi zetu, Yesu ametufanyia nini?
Ninasikia kuhusu makanisa yanayoteleza na kuingia katika ulimwengu. Polepole yanaachana na misimamo yao na kuruhusu fashoni mpya na majivuno ya ulimwengu kuingia. Sisikii sana habari za makanisa kusambaratika kwa sababu ya dhambi nzito, kama vile uasherati au ulevi. Adui wa roho zetu anatamani tuwe vuguvugu. Anataka kanisa lipoteze nguvu zake, lianze kuishi kama watu wengine wote. Hapa Haiti, kuna makanisa kila mahali. Jumapili asubuhi, kuanzia saa kumi na moja alfajiri, naanza kuyasikia makanisa yakiimba na kuabudu. Hata hivyo, watu hao wote wako wapi Jumatatu asubuhi? Wanachanganyika tena na ulimwengu walikotoka.
Hivi karibuni nilikuwa nikizungumza na mwanamume mmoja tajiri sana kutoka Haiti aliyemiliki hoteli za mapumziko na mali kote nchini Haiti. Nilimuuliza kama alikuwa Mkristo. (Nilitaka kuanzisha mazungumzo.) Niliweza kuona kwamba alitaka kusema ndiyo; badala yake, akafadhaika na kusema hapana. Nilimuuliza kwa nini. Alisema hasa kile nilichodhani angesema. “Nimetamani kuwa Mkristo, nimekwenda kwenye makanisa yote ya hapa, lakini sihisi kwamba yana chochote cha kunipa. Nina pesa; nina baraka za kimwili; lakini inaonekana hayo ndiyo tu wanayoyatafuta.”
Kama makanisa yetu ya leo yangekataa kutosheka na chochote kilicho chini ya kujazwa, kuwezeshwa na kuongozwa na Roho Mtakatifu, kipimo kamili cha nguvu za mbinguni, basi tungeweza kutoa kitu ambacho kingewavutia waliopotea wanaotuzunguka. Ninaamini kwamba hili ndilo hasa ulimwengu unatafuta; wanatafuta kitu bora zaidi, kitu kisicho cha kawaida. Namna gani kama tusingetosheka na chochote kilicho chini ya hayo? Namna gani kama tukaendelea kupiga magoti mpaka nguvu za Mungu zirudi? Namna gani kama tungeombolezea tena roho zetu na roho za wengine?
Nilikuwa nikishirikiana kwa karibu na kiongozi katili wa genge aliyeishi katika kijiji jirani. Alikuwa mgumu, lakini Mungu alikuwa amemwongoza kwangu. Kwa miezi saba mirefu tulikutana na kuwasiliana; nilitaka apate kuona kwa mbali nguvu za Mungu; nilitaka Mungu amwokoe. Mara nyingi alikuwa akilewa na kutishia kuniua; mimi niliendelea kumwelekeza kwa Mwokozi. Siku moja yeye na genge lake walikuja kusimamisha mradi wa kazi, wakisema kwamba sasa ardhi ilikuwa yao. Walionesha bunduki zao na kuwatishia wote waliokuwapo. Nilimweleza kwamba ardhi ilikuwa ya Mungu. Akasema, “Sawa; mwambie Mungu ashuke hapa, nami nitamkata kichwa.” Kauli hiyo ilinifadhaisha, nikamuuliza kama alielewa nguvu za Mungu ambaye alikuwa ametishia tu. Alasiri moja niliendesha gari hadi nyumbani kwake, tukaketi nje na kuzungumza. Siku hiyo Mungu aliniongoza nimhubirie ujumbe wa ujasiri. “Unahitaji kuacha maisha haya ya genge. Mungu anataka kukuokoa na kuubadilisha moyo wako!” Alionekana kuwa hajalewa nilipoendelea, “Huwezi kujua ni lini mtu atakuja hapa na kukuua! Huwezi kudhibiti hilo, lakini rafiki yangu, unaweza kudhibiti mahali utakapoenda baada ya kufa!” Kisha nikamkumbusha jambo baya alilokuwa amesema siku kadhaa kabla.
Tulipokuwa bado tunazungumza, wanaume wawili kutoka genge la jirani walikaribia wakiwa kwenye pikipiki. Walikuwa na silaha nyingi; walikuwa wamekuja wakati huo huo kumuua, lakini waliniona nikizungumza naye, wakasubiri niondoke. “Una mke na watoto, je, hujachoshwa na maisha haya? Mungu ana jambo bora zaidi kwa ajili yako!” Nilikuwa nikimsihi, nikiiombea roho yake. Hiyo ilikuwa fursa yake ya mwisho kabisa, kifo kilikuwa mlangoni. Nilipoondoka nilimwambia kwamba ningerudi.
Baada ya milio ya risasi nilirudi kwa haraka, lakini ilikuwa imekwisha… imekwisha kabisa.
Tunapoishi katika nguvu za ufufuo, nguvu za Mungu Mwenyezi, ndipo anapotenda kazi! Nahisi kuna kazi nyingi sana za kufanya kabla Bwana hajarudi, lakini watu wa Mungu wana shughuli nyingi mno, hatuna wakati.
Je, tunaogopa kuzungumza kuhusu nguvu za Mungu na Roho Mtakatifu kwa sababu tu vuguvugu la Kipentekoste limepotosha yale ambayo Biblia inafundisha? Mungu atusaidie.
Tunapomlilia Mungu atuokoe, tunafanya hivyo kwa sababu tunajua kwamba tunahitaji kuokolewa; kuongoka. Tunajua pia kwamba hatuwezi kujiokoa wenyewe, kwa hiyo tunamwomba Mungu atusaidie. Mungu anapotusaidia, tunaweza kufanya mambo ambayo hatukuweza kufanya hapo awali! Watu wenye hasira hawaendelei tena kuwa na hasira. Watu ambao hawakuweza kudhibiti tamaa zao sasa wanaweza kuzidhibiti. Watu wenye ubinafsi huanza kuwatanguliza wengine. Watu wenye haya huanza kuhubiri kwa ujasiri. Watu wenye tamaa huanza kuwapa wengine. Mungu hufanya kazi ambayo washauri na madaktari hawawezi kufanya; hubadilisha kiini cha mtu kabisa, kisha mambo yote huwa mapya. Sasa tunaishi kwa ajili ya kitu bora zaidi kuliko kile ambacho ulimwengu huu unaweza kutoa; tunainuka juu kwa nguvu za Mungu na kuuonesha ulimwengu huu uliougua kwa sababu ya dhambi kwamba kuna njia bora zaidi!
Kote katika Biblia, watu wa Mungu walifanya mambo yasiyo ya kawaida; hawakutosheka tu na maisha mazuri. Walitafuta kitu kikubwa zaidi, kitu bora zaidi. Kuna nguvu katika damu ya Yesu, lakini msalaba ulihitajika ili hilo liwezekane. Sisi pia tunahitaji msalaba ili tupate nguvu hizo. Akawaambia wote, Mtu yeyote akitaka kunifuata, na ajikane mwenyewe, ajitwike msalaba wake kila siku, anifuate. Kwa kuwa mtu atakaye kuiokoa nafsi yake, ataipoteza; bali mtu atakayepoteza nafsi yake kwa ajili yangu, ndiye atakayeiokoa –Luka 9:23-24. Ndiyo, inaonekana kuwa upumbavu kwa wale wanaopotea, lakini kwa wale wanaoamini, ni Nguvu za Mungu.
