# Kutoka kwa Mhariri Kutoka kwa MHARIRI Lugha: sw Toleo la asili: The Heartbeat of the Remnant, Majira ya baridi 2021, Nambari 4 Kurasa za asili: 3, 32, 33 Soma makala: PDF ya asili: Winter\-2021\-Remnant\(3\)\.pdf [The Heartbeat of the Remnant, Majira ya baridi 2021]() Salamu za upendo wa Kikristo kwa kila mmoja\. Mwaka mwingine umepita, na mwaka mwingine umetandazwa mbele yetu ili tupitie\. Mtazamo wetu ni upi? Je, tuna tumaini na furaha vinavyobubujika mioyoni mwetu, au wakati ujao unaonekana kuwa umejaa huzuni na maangamizi? Je, tunaona mkono wa Mungu mwenye enzi ukitenda kazi katika hali na mazingira yanayotuzunguka, au kwa mtazamo wetu ulimwengu unaonekana kuwa nje ya udhibiti? Ninapozungumza na watu kutoka maeneo mbalimbali ya nchi, inaonekana kuna jambo la kawaida ambalo watu wengi wanahangaikia—uchovu\. Uchovu wa maagizo\. Uchovu wa kufungwa kwa shughuli\. Uchovu wa mabishano na mapigano yote yaliyohusiana na suala la Covid\. Uchovu wa… Inaonekana watu wengi hawataki tu “kulifikiria hilo”\. Kwa nini? Sina hakika kabisa sababu zote ni zipi, lakini nina hakika kwamba kila mtu anayo sababu yake\. Tukumbuke kwamba Mungu anataka tuwe *…nao wenye busara kama nyoka, na wasio na hila kama hua –Mathayo 10:16\.* Hapa, nchini Marekani, Wakristo wamekuwa na zaidi ya miaka 60 \(tangu Vita vya Pili vya Dunia\) ya amani na utulivu wa kadiri\. Kwa sehemu kubwa, tumeachwa huru kulea familia zetu na kumwabudu Mungu wa baba zetu kulingana na dhamiri zetu\. Tumefurahia utengano wa Kanisa na Serikali ulioanzishwa mwanzoni mwa uwepo wa nchi yetu\. Tumeweza kufanya kazi kwa mikono yetu na kujipatia riziki\. Wengi wetu tumeishi kwa neema ya nchi hii yenye utajiri\. Huenda tulikuwa tunaishi ndani ya kiputo cha bandia\. Huenda tumetumbukizwa katika hali ya usalama wa uongo\. Vipi kuhusu wenzetu katika nchi mbalimbali duniani; hali yao halisi ya kuishi kama Wakristo wa kweli katika ulimwengu wao ikoje? Ni kweli, tumeweza kutumia utajiri na uhuru wetu wa kutembea kutenda mema mengi kwa ajili ya watu wengine duniani ambao wamevumilia magumu mengi kwa sababu ya kumfuata Kristo\. Lakini kwa gharama gani? Watoto wetu wamejifunza nini? Nyakati nyingine, tunasikia kuhusu Wakristo wa kizazi cha kwanza kuwa “na bidii kubwa” kwa ajili ya Bwana wao\. Nyakati nyingine, bidii hiyo huwa kubwa kiasi kwamba Wakristo wa kizazi cha pili na cha tatu hufikiri kwamba huenda Wakristo wa kizazi cha kwanza wana bidii nyingi kupita kiasi katika juhudi zao za kuwahubiria watu wanaowazunguka\. Vipi kuhusu kizazi kijacho? Wanajifunza kutoka kwa mtu fulani—kuhusu Mungu, wao wenyewe, na maisha\. Wanajifunza nini? Na wanajifunza kutoka kwa nani? Ni lazima tufanye tathmini ili kuhakikisha kwamba watoto wetu wanajifunza masomo ya maisha kwa namna itakayowaandaa kukabiliana na hali halisi ya mambo yatakayokuja\. *Na alipokuwa ameketi katika mlima wa Mizeituni, wanafunzi wakamwendea faraghani, wakisema, Tuambie, mambo hayo yatakuwa lini? Na ishara ya kuja kwako, na ya mwisho wa dunia ni nini? Yesu akajibu, akawaambia, Jihadharini mtu asiwadanganye\. Kwa maana wengi watakuja kwa jina langu, wakisema, Mimi ndiye Kristo; nao watadanganya wengi –Mathayo 24:3\-5\.* Kumbukeni kwamba Yesu Mwenyewe ndiye anayezungumza hapa na wafuasi wake kuhusu mwisho wa dunia\. Jambo lake la kwanza kabisa analohangaikia ni kwamba TUSIDANGANYWE\. Anasema kwamba udanganyifu utakuwa suala kuu wakati wa mwisho\. Anasema kwamba wengi watakuja wakidai kuwa Kristo \[au msemaji wake wa moja kwa moja\] ili wapate kusikilizwa, yote hayo yakiwa ni juhudi za kumdanganya msikilizaji na kujipatia wafuasi\. Kama hatukufanya hivyo hapo awali, bila shaka sasa ni lazima tuwafundishe watoto wetu mambo fulani mahususi kwa maneno na matendo\. Kwamba tunapaswa kuwa wageni na wasafiri tunapopita katika maisha haya\. Kwamba tukiwa marafiki wa ulimwengu huu, Mungu atakuwa adui yetu\. Na kwamba Ufalme wa Yesu si wa ulimwengu huu; kwa hiyo, watoto wake lazima wajifunze kuishi kama mabalozi katika nchi ya kigeni\. Watoto wetu wanahitaji kujua kwamba WOTE wanaoishi maisha ya kumcha Mungu katika Kristo Yesu WATAPATA mateso\. Mafundisho mengi yaliyofundishwa katika makanisa yetu na shughuli zinazohusiana na makanisa yamedhoofisha sana kizazi kijacho cha kanisa\. Tumefundishwa kwamba tunaweza kuwa na “uwezo wa ufufuo wake” bila kuhitaji kushiriki “mateso yake”\. Kristo anayeteseka pamoja na wafuasi wanaoteseka ametupiliwa mbali, na badala yake tunamfuata Yesu ambaye hataruhusu jambo lolote baya likupate\. Ingawa kuna msisitizo mkubwa kuhusu Yesu aliyeteseka na kufa kwa ajili yako, kuna mafundisho machache sana, au HAKUNA kabisa, kuhusu haja ya “kuuchukua msalaba wako kila siku” na kumfuata\. ## Afya ya Akili na Utulivu wa Kihisia Miaka kadhaa iliyopita, nilisoma hadithi ya mwanajeshi ambaye, baada ya kutumikia kipindi fulani nchini Iraq, alikuwa akihangaika kukabiliana na PTSD\. Ni kweli, ninaamini kwamba PTSD ni hali halisi, na mapambano hayo ni halisi, lakini niliposoma hadithi ya mtu huyu, nilizidi kuchoshwa na ukosefu wa majibu yaliyokuwa yakitolewa kwa kijana aliyekuwa akihangaika sana\. Baadhi ya mapambano yake makubwa zaidi yalitokana na kumbukumbu zilizokuwa zikimjia tena akilini kuhusu wakati alipowaua binafsi maadui kadhaa\. Haidhuru alihudhuria vikao vingapi vya ushauri nasaha, hakuweza kamwe kufikia hali ya amani na pumziko la ndani\. Akili yake ilikuwa na taabu\. Alikuwa na shida ya kulala\. Alikuwa na matatizo ya kuelewana na wengine\. Nilifikiri, “Laiti tu mtu fulani angeweza kumkaribia kijana huyu na kumshirikisha Injili ya Yesu Kristo\. Laiti angeonyeshwa Ukweli wa Neno la Mungu kwamba kuua mwanadamu mwingine ni dhambi machoni pa Mungu \(hata kama ni adui yake\) na kwamba Mungu hatamruhusu kuwa na amani moyoni mwake mpaka jambo hilo lishughulikiwe\. Pia, jambo la kusisimua kweli ni kwamba IKIWA angemjia Mungu kulingana na masharti ya Biblia na kutubu dhambi yake, basi angeweza kuanza kutembea na Mungu, naye Mungu angeweza kuanza kumpa amani kwa ajili ya nafsi yake yenye taabu\.” Katika miaka kadhaa iliyopita, kumekuwa na matukio mengi ya ufyatuaji risasi uliosababisha vifo vya watu wengi hapa Marekani\. Kila mara, viongozi wa umma hufanya mikutano na waandishi wa habari na kueleza mawazo yao katika jitihada za kujaribu kuelewa tukio jingine la kusikitisha linaloonekana kuwa lisiloelezeka\. Kwa kawaida, haichukui muda mrefu kabla mtu hajaanza kuzungumzia afya ya akili na haja ya kuongeza juhudi za umma za kuweka mifumo ya kinga, uchunguzi, na matibabu bora zaidi na mengi zaidi ili kuzuia vurugu hizi zisizo na maana\. Wiki kadhaa zilizopita, kulitokea tukio baya na la kusikitisha katika jimbo jingine tofauti na lile ninamoishi\. Katika mojawapo ya majiji makubwa, mwanamume mmoja alimsukuma mwanamke kutoka kwenye jukwaa na kumtupa kwenye njia ya treni ya chini ya ardhi iliyokuwa inakuja\. Mwanamke huyo hakunusurika\. Baada ya tukio hilo la kutisha sana, viongozi wa umma walitoa kauli kwa umma katika jitihada za kupunguza hofu inayoweza kutokea miongoni mwa watu\. Walihitimisha kwamba huenda mwanamume huyo alikuwa na matatizo ya kihisia na kwamba wangeongeza juhudi zao za kujaribu kuweka mifumo ya kinga kwa watu wenye matatizo ya afya ya akili, ili mambo kama hayo yasitokee tena\. Ni kweli, tunapolitazama suala hili kwa mtazamo wa ulimwengu, linaonekana kuwa na mantiki\. Lakini je, hii ndiyo hali yote? Je, sisi Wakristo tumezoea sana njia za ulimwengu kiasi cha kusahau jinsi ulivyoiacha mbali kweli ya Neno la Mungu? Tusielekeze kidole chetu kwa ulimwengu na viongozi wa umma waliochaguliwa\. Je, sisi kama kanisa ni bora zaidi? Tunaijua Biblia yetu kwa kiwango gani? Tunamjua Mwokozi wetu kwa kiwango gani? Mtu anapokuja kwetu akitafuta amani na pumziko la ndani, je, tunajua jinsi ya kumpeleka kwenye Maandiko, na kumwongoza kwa Yesu ambaye anaweza kumwonyesha njia ya kwenda kwa Baba? ![Wapandaji wawili wakisaidiana kupanda ukingo mkali wakati wa machweo]() Kwa nini ninasema haya yote? Tukiendelea kukipa kizazi kijacho cha kanisa majibu ya bandia na suluhisho za muda kwa matatizo ya maisha, basi HAKITAKUWA tayari *…kuvumilia hata mwisho… –Mathayo 24:13\.* *Akawaambia wote, Mtu yeyote akitaka kunifuata, na ajikane mwenyewe, ajitwike msalaba wake kila siku, anifuate\. Kwa kuwa mtu yeyote atakayetaka kuiokoa nafsi yake ataipoteza; lakini mtu yeyote atakayeipoteza nafsi yake kwa ajili yangu, huyo ndiye atakayeiokoa –Luka 9:23\-24\.* ## Rejeo la jarida - [Wapandaji wawili wakisaidiana kupanda ukingo mkali wakati wa machweo](): Adobestock\.com